Roaming ជា​សេវាកម្ម​មួយ​ប្រភេទ​សម្រាប់​ផ្ដល់​លទ្ធភាព​ឲ្យ​អ្នក​ប្រើប្រាស់​ទូរស័ព្ទ​ទាំង​អស់ អាច​ដំណើរការ​«ស៊ីមកាត» លេខ​ទូរស័ព្ទ​ដដែល​​ក្រៅ​​ដែន​កំណត់​សេវា​ក្នុង​ប្រទេស​មួយ​ នៅ​​ប្រទេស​មួយ​ផ្សេង​ទៀត​បាន​ធម្មតា។ ប៉ុន្តែ​រាល់​ការ​ប្រើប្រាស់​សេវា​ណាមួយ ដូច​ជា​ហៅ​ទូរស័ព្ទ​ចេញ ឬ​ផ្ញើ​សារ​ ក្រុមហ៊ុន​ដែល​ផ្គត់ផ្គង់​សេវាកម្ម​ឲ្យ​ស៊ីម​កាត​របស់​អ្នក​នឹង​កាត់​ទឹកប្រាក់​ជា​ធម្មតា ទៅ​តាម​តម្លៃ​កំណត់​ណាមួយ ​បើ​ទោះ​បី​ជា​អ្នក​ជា​ភាគី​ទទួល​ក្ដី ក៏​ក្រុមហ៊ុន​គិត​ថ្លៃ​​ពី​អ្នក​ដដែល។ មានន័យ​ថា ទោះ​បី​ជា​អ្នក​ជា​ភាគី​ទទួល (កាត់​ទឹក​ប្រាក់​ទាំង​សង​ខាង) ឬ​ភាគី​ផ្ដើម​ទំនាក់ទំនង(ជា​អ្នក​ផ្ញើ​សារ ឬ​ហៅ​ទូរស័ព្ទ​ចេញ) ក្ដី ទឹកប្រាក់​របស់​អ្នក​នឹង​ត្រូវ​កាត់​ក្នុង​តម្លៃ​កំណត់​ណាមួយ​ដោយ​ស្វ័យ​ប្រវត្តិ។ ជា​ទូទៅ​​សេវាកម្ម​Roaming ​មាន​តម្លៃ​ខ្ពស់​ជាង ​ការ​ប្រើប្រាស់​​ក្នុង​ស្រុក​ធម្មតា។
ឧទាហរណ៍៖ ស៊ីម​កាត​របស់​អ្នក ប្រើប្រាស់​ប្រព័ន្ធ​ណាមួយ​ក្នុង​ប្រទេស​កម្ពុជា ហើយ​អ្នក​ធ្វើ​ដំណើរ​ទៅ​ប្រទេស​ណាមួយ​ផ្សេង​ទៀត ដោយ​ចង់​ប្រើ​លេខ​ទូរស័ព្ទ​ដដែល។ ដូច្នេះ​អ្នក​គ្រាន់​តែ​ភ្ជាប់​សេវាកម្ម​Roaming របស់​Operator ដែល​អ្នក​កំពុង​ប្រើប្រាស់​នោះ​មាន​ន័យ​ថា ថ្វីត្បិត​តែ​អ្នក​ស្ថិត​នៅ​ប្រទេស​ទីពីរ ក្រៅ​ពី​កម្ពុជា​ក៏​អ្នក​នៅ​តែ​អាច​ប្រើប្រាស់​ស៊ីម ដូចជា​ហៅចេញ/ចូល ផ្ញើ/ទទួល​សារ និង​សេវា​ផ្សេងៗ​ដូច​នៅ​ក្នុង​ប្រទេស​អ៊ីចឹង ប៉ុន្តែ​ទឹក​ប្រាក់​របស់​អ្នក​នឹង​​ត្រូវ​បាន​កាត់ ពី​ស៊ីម​ដោយ​ស្វ័យ​ប្រវត្តិ​ក្នុង​តម្លៃ​កំណត់​ណាមួយ។
Roaming ចែក​ចេញ​ជា​ប៉ុន្មាន​ប្រភេទ? សេវា​កម្ម​ផ្គត់ផ្គង់​បណ្ដាញ​សេវា​ទូរស័ព្ទ​ឆ្លង​ប្រទេស​នេះ​ត្រូវ​បាន​បែងចែក​ជា​២ គឺ​SIM-based roaming និង​Username/password-based roaming។ ប្រភេទ​សេវាកម្ម​Roaming ទាំង​ពីរ​នេះ អនុញ្ញាត​ឲ្យ​អ្នក​ប្រើប្រាស់​ស៊ីម(Subscriber) ភ្ជាប់ ​(roam) ទៅ​កាន់​បណ្ដាញ​សេវា​ឥត​ខ្សែ​ក្នុង​ស្រុក ​(Wireless Local Area Network) តាមរយៈ​ការ​ភ្ជាប់​ទៅ​កាន់​GMS Mobile Operator (ក្រុមហ៊ុន​ម្ចាស់​ប្រព័ន្ធ​ស៊ីម​ដែល​គេ​កំពុង​តែ​ប្រើ) ឬ​ភ្ជាប់​ទៅ​កាន់​Mobile Operator ​ដែល​សហការ​ជាមួយ​Mobile Operatorដែល​គេ​កំពុង​ប្រើ​ ក្នុង​តំបន់/ប្រទេស​ដែល​អ្នក​ប្រើប្រាស់​នោះ​កំពុង​ស្ថិត​នៅ។
ដោយ៖ សប្បាយ